CBEX(Crypto Bridge Exchange) / Super Technology/ ST Technologies International Ltd E bipụtara: Eprel 17, 2025

E dọtala uche Securities and Exchange Commission (“Kọmishọn ahụ”) gaa na akụkọ mgbasa ozi na mbipụta nso a banyere ọrụ CBEX (Crypto Bridge Exchange). CBEX, nke na-arụkwa ọrụ n’aha ụlọ ọrụ ST Technologies International Ltd, Smart Treasure/Super Technology, egosila onwe ya dịka ikpo okwu ịzụ na ire akụ dijitalụ, na-ekwupụta na ọ na-enye ndị na-etinye ego na Naịjirịa nnukwu uru.

Kọmishọn ahụ na-eme ka o doo anya na ọ dịghị mgbe ọ bụla o nyere CBEX ma ọ bụ ndị ya na ha jikọrọ aka ndebanye aha ka ha rụọ ọrụ dịka ahịa mgbanwe akụ dijitalụ, rịọ ọha na eze ka ha tinye ego, ma ọ bụ rụọ ọrụ ọ bụla ọzọ n’ahịa isi ego Naịjirịa.

Nnyocha mbido nke Kọmishọn ahụ mere ekpughere na CBEX mere mgbasa ozi iji mee ka ọha na eze chee n’ụzọ ụgha na ọrụ ya ziri ezi, iji rata ndị mmadụ na-amaghị ihe egwu ahụ ka ha tinye ego, site n’ikwe ha nkwa na ha ga-enwetarịrị nnukwu uru a na-apụghị ikwenye na ọ ga-ekwe omume n’ime obere oge. CBEX emezughị arịrịọ ndị debanyere aha na ya maka iwepụ ego ha, mechiekwa ụlọ ọrụ ya ndị mmadụ na-aga na mberede, mgbe mkpesa na-arị elu.

Dị ka ndokwa nke Nkebi 196 nke Investments and Securities Act 2025 si kwuo, Kọmishọn ahụ ga-arụkọ ọrụ na ụlọ ọrụ mmanye iwu ndị metụtara ya iji mee ihe mmanye iwu kwesịrị ekwesị megide CBEX, ndị ya na ha jikọrọ aka na ndị na-akwalite ya.

Kọmishọn ahụ ji ụzọ a echetara ọha na eze ka ha ZERE itinye ego na, ma ọ bụ ime azụmahịa na, ụlọ ọrụ ọ bụla na-enye nkwa uru na-abụghị ezi uche ma ọ bụ na-eji usoro itinye ego yiri ya nke dabere n’ịkpọbata ndị ọzọ. A dụrụ ndị na-eche itinye ego ọdụ ka ha NYOCHAA ọnọdụ ndebanye aha nke ikpo okwu itinye ego site na ọnụ ụzọ ịntanetị pụrụ iche nke Kọmishọn ahụ: www.sec.gov.ng/cmos tupu ha emee azụmahịa na ha.

A BINYERE AKA
NDỊ NCHỊKWA
17 Eprel 2025